Yaşıl və Qırmızı xətlərin ayrılması layihəsinin nəticələri ("Nizami" və "28 May" stansiyaları arasında)
2026-cı ilin sentyabr ayında Bakı Metropoliteninin sərnişin sayı ötən ilin müvafiq dövrü ilə müqayisədə təxminən 30% azalıb.
Day.Az xəbər verir ki, bu barədə Trend-in sorğusuna cav olaraq "Bakı Metropoliteni" QSC-dən məlumat verilib.
Qeyd olunur ki, gündəlik göstəricilərin müqayisəsi avqustun 15-dən sonra sərnişin axınında nəzərəçarpacaq dəyişiklik olduğunu göstərir.
"Avqustun ilk 14 günü ərzində daşınan sərnişinlərin sayı ötən ilin müvafiq dövrü ilə müqayisədə demək olar ki, dəyişməyib və hətta 0,6% artıb. Avqustun ikinci yarısında sərnişin axını ötən ilin müvafiq dövrü ilə müqayisədə təxminən 28% aşağı olub. Sentyabrda da təxminən 30% azalma qeydə alınıb", - məlumatda bildirilir.
QSC-dən vurğulanıb ki, bu dəyişikliklər xətlərin ayrılması layihəsinin icrası prosesinin xüsusiyyətləri nəzərə alınmaqla gözlənilən və qanunauyğundur.
Qeyd edək ki, Yaşıl və Qırmızı xətlərin ayrılması layihəsi çərçivəsində tunel işlərinin aparılması ilə əlaqədar avqustun 15-dən "Nizami" və "28 May" stansiyaları arasında qatarların hərəkəti dayandırılıb. Tikinti mərhələsinin təxminən 10-11 ay davam edəcəyi gözlənilir.
Layihə Prezident İlham Əliyevin sərəncamı ilə təsdiq edilmiş "Bakı şəhərində və onun ətraf ərazilərində nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı" əsasında həyata keçirilir.
Xətlərin ayrılması nəticəsində onlar arasındakı mövcud asılılığın aradan qaldırılması, stansiyaların yüklülüyünün azaldılması, qatarların hərəkət intervalının qısaldılması və metroda hərəkətin daha sabit təşkilinin təmin edilməsi planlaşdırılır.
İşlər başa çatdıqdan sonra "İçərişəhər" stansiyası istiqamətində hərəkət edən sərnişinlər "28 May" stansiyasının platformasından, "Dərnəgül" istiqamətinə gedənlər isə "Cəfər Cabbarlı" stansiyasının platformasından istifadə edəcəklər.
