Çingiz Şafievin xatirəsi onu tanıyanların hamısının yaddaşında əbədi qalacaq
BAŞSAĞLIĞI
Dərin hüzn içərisindəyik. "Judo Club 2012" idman klubunun direktoru Çingiz Məmmədrəsul oğlu Şəfiyevin vəfatı bizi hədsiz dərəcədə kədərləndirib.
Çingiz müəllim şərəfli zabit peşəsini seçərək, ömrünün böyük bir hissəsini hərbi işə həsr etmiş, ordumuzun möhkəmləndirilməsində, vətənimizin müdafiəsinin təşkilində fəal iştirak etmiş, müəyyən müddətdə Silahlı Qüvvələrimizin iri hərbi birləşmələrindən birinin komandanı olmuşdu.
Biz onunla əməkdaşlığımıza böyük dəyər veriridk. Yüksək biliyi, rəhbərlik təcrübəsi sayəsində öhdəsinə düşən vəzifələri layiqincə icra edir, etimadımızı doğruldurdu. Daim işə məsuliyyətli münasibəti, işgüzarlığı, alicənablığı ilə seçilir, gənc həmkarlarımıza nümunə olurdu.
Çingiz müəllimi vaxtsız itirdik. Bu ağır gündə onun ailəsinin, əzizlərinin yanında olmağı özümüzə borc bilirik. Onlara səbir və dözüm diləyirik.
Allah mərhum dostumuza rəhmət eləsin.
Azər Əsgərov
"Judo Club 2012" idman klubunun təsisçisi, Azərbaycan Cudo Veteranları Assosiasiyasının prezidenti.
YOLDAŞIMIZIN XATİRƏSİ
AZMAN HOLDİNG kollektivinə ağır itki üz verib. Holdinqin tərkibindəki "Judo Club 2012" idman klubunun direktoru Çingiz Məmmədrəsul oğlu Şəfiyev noyabrın 23-də 56 yaşında vəfat edib.
Ç.Şəfiyev Azərbaycan Ordusunun yüksək rütbəli kadr zabitlərindən olmuşdu. O, Bakı şəhərində orta məktəbi bitirdikdən sonra Rusiya Federasiyasında, Uzaq Şərq Ali Hərbi Komandirlər Məktəbində təhsil almış, 1990-1992-ci illərdə keçmiş sovet ordusunda xidmət etmişdi. 1992-ci ildən müstəqil Azərbaycanın silahlı qüvvələrində gənc zabit kimi xidmətini davam etdirmiş, Türkiyə Respublikasının Quru Qoşunları Hərb Akademiyasında təhsilini daha da təkmilləşdirmiş, 2014-cü ilə kimi Müdafiə Nazirliyinin hərbi hissə və birləşmələrində komandir vəzifələri tutmuş, general rütbəsindək yüksəlmişdi.
Ç.Şəfiyev 2006-cı ildə “Hərbi xidmətdə fərqlənməyə görə”, 2009-cu ildə “Vətən uğrunda” medalları ilə təltif olunmuşdu.
Ordudan tərxis olunduqdan bir müddət sonra, 2017-ci ildən AZMAN HOLDİNG-də çalışırdı. Bu il isə “Judo Club 2012” idman klubunun direktoru vəzifəsinə təyin edilmişdi.
Yüksək mənəvi-əxlaqi keyfiyyətləri, işgüzarlığı, öz vəzifələrinin icrasına məsuliyyətli münasibəti ona kollektivin hörmət və ehtiramını qazandırmışdı.
Çingiz Məmmədrəsul oğlu Şəfiyevin əziz xatirəsi onu yaxından tanıyanların yaddaşında daim yaşayacaqdır.
Mərhuma Allahdan rəhmət, ailəsinə səbir və dözüm diləyir, dərin hüznlə başağlığı veririk.
