Azərbaycanın turizm potensialı Almaniyada nümayiş olunur
Azərbaycanın turizm potensialı Almaniyanın paytaxtı Berlin şəhərində keçirilən “ITB Berlin 2026” sərgisində tanıdılır.
3-5 mart tarixlərində keçirilən sərgidə Azərbaycan Turizm Bürosunun təşkilatçılığı ilə milli stenddə Azərbaycan Hava Yolları (AZAL), hotellər, turizm agentlikləri daxil olmaqla 13 sənaye tərəfdaşının iştirakı ilə ölkə turizminin təbliği və təşviqi məqsədilə B2B görüşlər keçirilir və əməkdaşlıq imkanları müzakirə edilir.
Sərgi çərçivəsində milli stenddə “Gizli xəzinələr: təcrübələrin kəşfi” mövzusunda Azərbaycanın dağ piyada marşrutları haqqında və tarixi İpək Yolu irsini əks etdirən təqdimatın da nümayişi planlaşdırılır.
Azərbaycanın Almaniya Federativ Respublikasındakı fövqəladə və səlahiyyətli səfiri Nəsimi Ağayev milli stendi ziyarət edib.
Xatırladaq ki, Azərbaycan Respublikasının Almaniya Federativ Respublikasındakı səfirliyinin təşkilatçılığı ilə Azərbaycan Turizm Bürosu tərəfindən Alman Səyahət Assosiasiyasının üzvləri üçün ölkəmizin turizm potensialı barədə təqdimat keçirilib. Görüşdə Dövlət Turizm Agentliyinin sədrinin müavini Azadə Hüseynova və Azərbaycanın Almaniya Federativ Respublikasındakı fövqəladə və səlahiyyətli səfiri Nəsimi Ağayev çıxış ediblər.
Qeyd edək ki, 2025-ci il ərzində 11% artımla Almaniyadan Azərbaycana 24 mindən çox xarici ziyarətçi səfər edib.
***
BMT Turizmin Nazirlər Sammiti çərçivəsində əməkdaşlıq görüşləri keçirilib
Dövlət Turizm Agentliyinin sədrinin müavini Azadə Hüseynova Almaniyanın paytaxtı Berlin şəhərində 20-ə yaxın ölkənin turizm nazirinin iştirakı ilə keçirilən BMT Turizm Təşkilatının Nazirlər Sammitində təşkil olunan müzakirələrdə iştirak edib.
Sammit zamanı sədrin müavini Özbəkistanın Dövlət Turizm Komitəsinin sədri Abdulaziz Akkulov ilə görüş keçirib. Görüşdə hər iki ölkənin turizm sahəsində hədəf bazarları üzrə fəaliyyət prinsipləri və təşviqat strategiyaları barədə qarşılıqlı məlumat mübadiləsi aparılıb. Bununla yanaşı, 2025-ci ilin aprel ayında Azərbaycan Turizm Bürosu ilə Özbəkistan Milli Təbliğat Mərkəzi arasında imzalanmış əməkdaşlıq haqqında Anlaşma Memorandumun müddəlarına uyğun olaraq görülmüş işlər nəzərdən keçirilib, əməkdaşlığın daha da gücləndirilməsi istiqamətində əlavə alətlər üzrə razılığa gəlinib.
Səfər çərçivəsində Azərbaycan Respublikasının Almaniya Federativ Respublikasındakı səfirliyində Almaniyanın turizm sənayesi nümayəndələrinin iştirakı ilə görüş təşkil edilib. Görüşdə Azərbaycanın Almaniyadakı fövqəladə və səlahiyyətli səfiri Nəsimi Ağayev iştirakçıları salamlayaraq Azərbaycanın Almaniyalı turistlərin diqqətini çəkəcək zəngin turizm potensialına malik olduğunu qeyd edib. Öz növbəsində Azadə Hüseynova görüşdə çıxış edərək ölkəmizin ev sahibliyi ilə keçiriləcək mötəbər beynəlxalq tədbirlər barədə ətraflı məlumat verib. Daha sonra Azərbaycan Turizm Bürosu tərəfindən ölkəmizin turizm potensialını əks etdirən təqdimat nümayiş etdirilərək sənaye nümayəndələrinin sualları cavablandırılıb.
