ŞƏHİDLƏRİN XATİRƏSİNƏ HƏSR OLUNMUŞ ƏDƏBİ- BƏDİİ GECƏ KEÇİRİLDİ VƏ FRANSA SƏFİRLİYİNƏ ÜNVANLANMIŞ BƏYANAT QƏBUL EDİLDİ

Bakı Şəhər Mədəniyyət Baş İdarəsi Yasamal rayon Mərkəzləşdirilmiş
Kitabxana Sisteminin Mərkəzi Kitabxanası, 2 nömrəli kitabxana filialı,
“Demokratik Cəmiyyət və Qadın Hüquqlarının Müdafiəsi” və “Azərbaycan
Yazıçı Qadınlar Cəmiyyəti” ictımai birliklərinin təşkilatçılığı ilə Yasamal
rayon Heydər Əliyev Mərkəzində şəhidlərə həsr olunmuş “Qəhrəman Vətən
oğulları” adlı ədəbi-bədii gecə keçirildi.
Tədbirin əvvəlində əbədiyaşar şəhidlərimizin əziz xatirəsi bir dəqiqəlik
sükutla yad edildi. Tədbir iştirakçıları Ulu Öndərin Yasamal rayon Heydər
Əliyev Mərkəzindəki abidəsini ziyarət etdilər.
Ədəbi-bədii gecəni giriş sözü ilə açan Yasamal rayon MKS-nin
direktoru, tarix üzrə fəlsəfə doktoru, Fəxri mədəniyyət işçisi Lətifə
Məmmədova şəhidlərin valideynlərini, qaziləri, veteranları və qonaqları
salamladı. O qeyd etdi ki, şəhid ailələri daima bizim diqqət mərkəzindədir.
Biz işğal altında olan torpaqlarımızı qanları, canları bahasına yağılardan
azad edən şəhidlərimizə, qazilərimizə, veteranlarımıza borcluyuq.
Azərbaycan Silahlı Qüvvələrinin ilk uğuru 1994-cü il yanvarın 5-dən
6-na keçən gecə və yanvarın 17-də həyata keçirdiyi əməliyyat nəticəsində
Horadiz qəsəbəsi, Cocuq Mərcanlı kəndi və Arazboyu bir neçə kənd
işğaldan azad olunması ilə bağlıdır, Ulu Öndərimizin adı ilə bağlıdır. Mən
burada iştirak edən şəhid valideynlərinin qarşısında baş əyirəm. Hər bir
şəhidin adı Azərbaycan tarixinə qızıl hərflərlə yazılıb. Onlar Dövlət
himnimizi, “Qarabağ şikəstəsi”ni oxuya-oxuya ölümün üzünə dik baxdılar,
Şuşamızı, Kəlbəcərimizi, Qubadlımızı, Zəngilanımızı, Ağdamımızı,
Cəbrayılımızı, Füzulimizi, Laçınımızı, Xocavəndimizi, Xankəndimizi,
Xocalımızı, Ağdərəmizi, bütün Qarabağımızı düşməndən azad etdilər.
Cənab Prezident dəfələrlə qeyd etmişdir ki, Qələbəni qazanan,
torpaqlarımızı azad edən şəhidlərimiz, əsgər və zabitlərimizdir.
Şəhidlərimizin əziz xatirəsinə hekayə və povestlər, romanlar, poema və
şeirlər, esse və oçerklər, əfsanələr yazılır və yazılacaq, teatr səhnələrində
onlara həsr olunmuş tamaşalar qoyulacaq, kinofilmlər çəkiləcək, rəsm və
incəsənət əsərləri yaradılacaq.
“Demokratik Cəmiyyət və Qadın Hüquqlarının Müdafiəsi” İctimai
Birliyin sədri Mehriban Abdullayeva qeyd etdi ki, bu gün biz “Qəhrəman
Vətən oğulları” tədbirini Yasamal rayon Mərkəzi Kitabxanası ilə birlikdə
keçiririk. Mənim ailəmin də dörd şəhidi var. Azad olunmuş torpaqlar
şəhidlərimizin əmanətidir. Ali Baş Komandan xalqa müraciət etdi və Vətən
torpaqlarını düşmən tapdağından azad etməyə çağırdı. Xalqımız ayağa
qalxdı. Azərbaycan xalqının övladların qanı yerdə qalmadı, Azərbaycanın
üstündən qara duman getdi. Əsgər və zabitlərimiz torpaqlarımızı azad etdi.
Şuşamızı çətinliklə də olsa geri qaytara bildik. Bilməliyik ki, bir düşmənimiz

var, o da ermənidir. Biz şəhid ailələri ilə daima təmasda oluruq. Şəhid
olmaq hər adama qismət olmur, onlar cənnət quşu, mələkdirlər. Biz 7
fevralda keçirilən Prezident seçkilərində yaxından iştirak edəcəyik, bu bizim
Konstitusiya hüququmuzdur. Torpaqlarımızı bizə qaytaran Ali Baş
Komandana səs verəcəyik.
2 nömrəli kitabxana filialının müdiri vəzifəsini icra edən İradə
Hüseynova vurğuladı ki, tədbirimiz Vətən torpağı uğrunda döyüşmüş və
canlarını qurban vermiş şəhid oğullarımıza həsr olunub. Onlar “Vətən”
deyərək şəhadət zirvəsinə ucaldılar, şəhidlər gözlərimizdən axan
yaşımızdır. Mən bu yaxınlarda bir şəhid anası ilə danışarkən ana mənə
sual verdi ki, deyirlər şəhidlər ölməzdir, bəs şəhid balam niyə mənim
yanımda deyil? Dedim ki, onlar əzəmətli dağdılar, zirvələrə ucalıblar və hər
bir ailənin qəlbində, ürəyindədirlər. İ.Hüseynova “Ağlama, şəhid anası”
şeirini söylədi.
Şəhid Əlizaman İslamovun anası Hürnisə Kərimova: “Əlizaman
mənim yeganə övladım idi. Mənim oğlum Vətən yolunda şəhid oldu,
sinəsini qabağa verib ölümə getdi, ölümün gözünə dik baxdı, canı, qanı
bahasına vuruşub şəhid oldu”, – sözlərini deyərək kövrəldi.
“Azərbaycan Yazıçı Qadınlar Cəmiyyəti” İctimai Birliyin sədri, yazıçı,
publisist, kitabxananın Fəxri oxucusu Nüşabə Məmmədli qeyd etdi ki, belə
tədbirlər nə qədər sevindirici olsa da, amma hər dəfə şəhid ailələri ilə
görüşərək içimdə tüğyan edirəm. Nə üçün bizim başımıza bu bəlalar gəldi?
Bütün əsərlərimi yazanda yadıma bu sözlər düşür:

“Vətən mənə oğul desə, nə dərdim,
Mamır olub qayasında bitərdim”.

Sözlərin mənasına baxın, yəni canımdan keçib torpaqda mamır
olardım. Əgər övlad Vətənə xidmət edərkən şəhid olubsa, o ana üçün
balanın xöşbəxt ölümüdür. Başınızda qara örpək, saçlarınız vaxtından tez
bəyaz olan şəhid analarımız, hamınız gözümüzün nurusunuz. Mən özüm
şahidiyəm ki, nə qədər könüllülər düşmənlə vuruşmaq üçün cəbhəyə getdi.
44 gün, sonra isə 23 saat 43 dəqiqə ərzində Qələbəni əldə etmək əsl
qəhrəmanlıqdır. Kim bu Qələbəni bizə verdi? Əlbəttə ki, Ali Baş Komandan.
Şəhid mayor Ruslan Cəfərovun anası Alimə Cəfərova məlumat
verərək bildirdi ki, ailəsində hərbiçi çoxdur. Ruslan ehtiyatda olan hərbiçi
idi. O həmişə deyirdi ki, əgər torpaqlarımızın azadlığı uğrunda savaş olsa,
mən cəbhəyə gedəcəyəm. Oğlum Ruslan Füzulinin azadlığı uğrunda
gedən döyüşlərdə şəhid oldu, digər iki oğlum da Vətən uğrunda vuruşdu.
Onlar eyni cəbhədə olduğlarına baxmayaraq biri-birindən xəbərsiz
vuruşurdu. İkinci oğlum veteran olub, üçüncü oğlum isə Xankəndini azad
edib.
3 nömrəli kitabxana filialının müdiri Arzu Xudayarova “Şəhidlər” şeirini
söylədi.
““Zirvə” İslahatlara Dəstək Mərkəzi” İctimai Birliyin sədri, ehtiyatda
olan zabit Elçin Axundzadə çıxışında Birinci Qarabağ müharibəsinin
iştirakçısı olduğunu vurğuladı və qeydetdi ki, 90-cı illərin əvvəllərində

ordumuz çox böyük uğursuzluqlarla uzlaşdı. Həm daxildən, həm də
xaricdən bizə təzyiqlər oldu. Biz ədalətli sülh istəyirdik və buna nail olduq.
44 günlük Vətən müharibəsində biz Xankəndiyə girə bilmədik, amma bunu
sonradan etdik, bununla da ermənilərə ciddi zərbə vurduq. Tanrı dövlətimizi
qorusun, Tanrı Azərbaycanı qorusun. Biz Ali Baş Komandanın ətrafında
birləşmişik.
“Mədəni İnkişafın Təbliğı” İctimai Birliyin sədri, şair Xatirə Fərəcli
qürur hissi ilə qeyd etdi ki, tədbirlərdə şəhid anaları danışanda mən onları
heyrətlə dinləyirəm, çünki onlar qəhrəman anadılar, onların oğulları da
qəhrəman oldular. Qarşınızda baş əyirəm, analar. Eşq olsun, bizə Zəfər
yaşadan şəhidlərimizə. Sonra o, şəhidlərə həsr etdiyi şeirlərini oxudu.
Qazi Elnur Fərzəlibəyov çıxışını bu sözlərlə başladı: “Analarımızın
əllərindən öpürəm, onların qarşısında baş əyirəm. Mənim üçün burada
danışmaq çox çətindir. Mən Aprel döyüşlərində və Vətən müharibəsində
iştirak etmişəm. İgidliyə görə medalla təltif olunmuşam. Sizin övladlarınızın
qanı yerdə qalmadı, onların qanı on qat alındı”.
Şairə Nafilə Nafi qeyd etdi ki, hər bir ailənin qazisi, yaxud şəhidi var.
Müharibə gedən vaxtlarda mən çox ağlayırdım. Qələbə günündə hamı
gülürdü. Soruşurdum ki, nə olub? Dedilər Qələbə qazanmışıq. Ali Baş
Komandan bizi dünyaya tanıtdı. O, “Bağışla, Şuşam” şeirini oxudu.
Şəhid Rəşid Baxşəliyevin anası Çimnaz Baxşəliyeva, Aprel şəhidi
Nurəddin Mirzəliyevin anası Fəxriyə Burciyeva,
şəhid Anar Ələsgərlinin anası Tərlan Ələsgərli, şəhid Qurban Cəfərovun
anası Mətanət Cəfərova və b. dedilər ki, onların sözünü oğulları dedi və
şəhıd anaları tədbirin təşkilatçılarına minnətdarlıqlarını bildirdilər.
Qazi Vüqar Əhmədov dedi: “Bura gəlmək, valideynlərin qarşısında
danışmaq çox çətindi. Mən ehtiyatda olan zabitəm, 44 günlük müharibədə
vuruşmuşam, rütbəsindən asılı olmayaraq hamı döyüş meydanında idi.
Müharibə itkisiz olmur. Şəhid olan zabit və əsgərlər qəlbimizdə əbədi
yaşayacaq. Kimin şəhid olacağını Allah buyurur. Biz şəhid xəbəri gəldikcə,
daha da qəzəblənirdik və bu qəzəbdən güc alırdıq. Mən istəmirəm ki, şəhid
analarımız ağlasınlar. Allah onların övladlarına uca şəhidlik zirvəsini fəth
etməyə izn verib”.
Şəhid Ramil Hüseynovun atası Qüdrət Hüseynov çıxışında dedi ki,
biz hərbiçi ailəsiyik, mən Birinci Qarabağ müharibəsi iştirakçısıyam. Vətən
torpağını qorumaq üçün qazilərimiz, şəhidlərimiz canlarını fəda etdilər.
Onlar həm torpaq oldular, həm su oldular. Mən istərdim ki, belə tədbirlər
çox olsun, şəhidlər daima xatirələrdə yaşasın. Şəhidlərimizin hər biri hər
zaman anılacaq, tarixdə və qəlblərdə yaşayacaq.
Şair İldırım Əlişoğlu qeyd etdi ki, Azərbaycanın düşməni yalnız
ermənidir. Ali Baş Komandan “Qarabağ Azərbaycandır!” nöqtəsini – nida
etdi. Şair yazdığı “Ali Baş Komandan” şeirini oxudu.
Tədbirdə “Azərbaycan Yazıçı Qadınlar Cəmiyyəti” İctimai Birliyinin
sədri və üzvləri çıxış edərək, Xuşidbanu Natəvanın Fransanın Evian-le-Ben
şəhərindəki abidəsi ətrafında gedən mübahisələrdən danışdılar, həyəcan

təbili çaldılar, erməni lobbisinin hərəkətlərini pislədilər. Sonra isə tədbir
iştirakçıları Fransa Respublikasının Azərbaycandakı Səfirliyinə
ünvanlanmış Xan qızı Nətavanın heykəli ilə bağlı Bəyanat qəbul etdilər.
Tədbirin bədii hissəsində xanəndə, muğam ustası, kitabxananın Fəxri
oxucusu Maya Cəbrayılova ürək sözlərini deyərək qeyd etdi ki, tədbir çox
önəmlidir, gələcək nəsillərə yadigar izlərini qoyub şəhidlərimiz. Qəlbimizdə
daima və əbədi yaşayacaq nur üzlü oğullarımız. Onları biz anırıq, anaları
Allah var eləsin. Bizi qoruyan, Vətənə xidmət edən əsgərlərimizi Allah var
eləsin. Sonra o, “Qarabağ” və “Şuşanın dağları” mahnılarını ifa etdi.
“Mehriban” mahnı və rəqs kollektivinin üzvləri Məryəm Bəbirli, Nərmin
Talıbova, Nihad Həsənov, Nərmin Yaqub-zadə, Nilgün Şərifova “Ey Vətən”,
“Şuşa, qollarını aç” (Zəfər himni) mahnılarını ifa etdilər. Qrupun üzvləri,
vokal üzrə bədii rəhbəri Esmiralda Hüseynova, kollektivin yaradıcısı və rəqs
üzrə bədii rəhbəri Səbinə Nəcəfova vətənpərvərlik mövzusunda mahnıların
ifasına görə M.Ş.Vazeh adına Mərkəzi Kitabxananın fəxri fərmanları ilə təltif
olundular.
Tədbirdə 4 nömrəli kitabxana filialı tərəfindən hazırlanmış şəhidlərə
həsr olunan videoçarx nümayiş olundu.
Videoçarx Mərkəzi Kitabxananın YouTube kanalında yerləşdirilib:
https://www.youtube.com/watch?v=LMMMP16aZEY&t=132s
Fransa Respublikasının Azərbaycan Respublikasındakı Səfirliyinə
“Azərbaycan Yazıçı Qadınlar Cəmiyyəti”nin Bəyanatı aşağıdakı keçiddə
yerləşdirilib:
https://docs.google.com/document/d/1Ewooq8hexhZlxbzX2bYFA3X96SIhtt
zK/edit?usp=sharing&ouid=110237449792357966265&rtpof=true&sd=true