НОВОСТИ В СФЕРЕ ТУРИЗМА

Azərbaycanın işgüzar turizm potensialı Moskvada təbliğ olunur

Azərbaycan Turizm Bürosunun iştirakı ilə sentyabrın 11-də Rusiya Federasiyasının Moskva şəhərində keçirilən “MICE4U” tədbirində ölkəmizin işgüzar turizm potensialı tanıdılıb.

Tədbirdə iştirakın əsas məqsədi Azərbaycanın qabaqcıl işgüzar tədbirlər destinasiyası kimi mövcud imkanlarını qlobal müstəvidə nümayiş etdirmək, potensial tədbirləri və tərəfdaşları müəyyənləşdirmək, həmçinin təbliğat fəaliyyətini genişləndirməkdir. 

Rusiyanın işgüzar turizm sahəsi üzrə aparıcı mütəxəssis və agentlikləri ilə keçirilən B2B formatlı görüşlərdə Azərbaycanda işgüzar tədbirlərin təşkili üzrə mövcud infrastruktur və bütövlükdə ölkəmizin turizm potensialı haqqında məlumat verilib. 

Qeyd edək ki, 2024-cü ilin yanvar-avqust aylarında Rusiyadan ümumilikdə Azərbaycana 501 417 nəfər səfər edib ki, bu da 2023-cü ili eyni dövrü ilə müqayisədə 18%-dan çox artımdır.

***

Azərbaycan Vyanada keçirilən turizm tədbirində təmsil olunub

Azərbaycan Turizm Bürosu Vyana Ticarət Palatası tərəfindən Avstriyanın paytaxtı Vyanada təşkil olunmuş 13-cü səyahət agentlikləri gününündə ilin seçilmiş destinasiyası qismində təmsil olunub.

Tədbirdə Azərbaycan Turizm Bürosu ilə yanaşı, “Azərbaycan Hava Yolları” (AZAL) QSC-ni təmsil edən "AVIAREPS" aviaşirkəti və Avstriyanın "Elite Tours" şirkəti Azərbaycanı önəmli destinasiya kimi tanıdan xüsusi turizm təklifləri ilə çıxış ediblər.

180-dək turizm sənayesi nümayəndəsini bir araya gətirən tədbirdə Azərbaycanın zəngin mədəni irsi və unikal turizm təcrübəsi haqqında məlumat verilib.

Azərbaycan Turizm Bürosunun Baş icraçı direktoru Florian Zenqstşmid tədbirdəki çıxışında Vyanadan Bakıya birbaşa uçuşların həyata keçirilməsinin strateji məqsədlərdən biri olduğunu, uçuşların yalnız Avstriya ilə deyil, regionda digər hədəf ölkələrlə də turizm əlaqələrinin genişləndirilməsinə müsbət təsir edəcəyini bildirib. 
O, Avstriyada mütəmadi olaraq keçirilən, turistlərin sayının artırılmasına yönəlmiş tanıtım və təbliğat tədbirlərinin intensivləşdiriləcəyini qeyd edib.

Tədbirin sonunda Azərbaycanın caz ifaçısı İsfar Sarabskinin musiqiləri dinlənilib.

Qeyd edək ki, Avstriya Respublikasının vətəndaşları üçün sadələşdirilmiş viza rejimi çərçivəsində “ASAN Viza" elektron sistemi tətbiq olunur.